Saturday, April 25, 2009

برج العقربScorpion
المولود بين 23 تشرين الأول/أكتوبر و21 تشرين الثاني/نوفمبر
الكلمات الرئيسية التي تصف مولود هذا البرج: قوي، مركز، مخترق، سري وغيور.
مولود العقرب شخص لديه ميول نحو التملك والسرية. يعتبر هذا الشخص خبير في جعل الآخرين يكشفون عن أسرارهم بسهولة، على الرغم من أنه نادراً ما يفتح نفسه لأي أحد. مولود العقرب يخصص 100٪ من طاقته لكل شيء يفعلونه ونادرا ما يستسلم. يعتبر العقرب إنسان حاسم ومتطلب عندما يتعلق الامر بالحب ويتوقع ولاء وإخلاص كامل وتفاني قوي من الشريك. وهناك الكثير من الطاقة التي تركز على السعي إلى الجنس والسلطة. مولود العقرب يحتاج إلى شريك شغوف وعاطفي وعنيد ويجد صعوبة في احترام الشخص الضعيف الإرادة أو السلبي

Monday, November 17, 2008

حنان

كانت زميلتى فى اولى ثانوى كانت قاعده فى الصف الاول جوه جنب الحيطه وتحت الشباك هدومها ملخبطه وأوسع من حجمها 10نمر وطرحتها يرقض تحتها 10كيلو كنافة متشابكه لم يهوى بها المشط من عشرات السنين، الناس بتبصلها على انها شئ منبوذ وغريب وانا ببصلها على انها شئ جواه شئ أغرب من الى ظاهر فيه سبب لده ومنذ بادية الدراسه وانا اراقب ردود افعالها وردود الفعال الزملاء والمدرسين. الزملاء يتجنبوها والمدرسين يتعاملون معها على انها غلبانه ومختله وهينجحوها لوجه الله ويقعهدوها لما يسألوها وكل وجوههم امتعاض منها. وانا اراقب واتمزق اريد أن اسألها ما بك وسأحاول ان اساعدك ولا اريد أن احرجها او اضايقها، أريد أن احتضنها وأن اعطيها حنانا قد يكون هرب منها ولكن لاأجرؤ على جرحها واشعارها بأنها ينقصها شئ. ومر العام الدراسى وعلمت أن أمها متوفيه وانها تعيش مع زوجة ابيها وانتهى العام الدراسى وانتقلت لمدرسه أخرى ولم أرها ولكن مازالت صورتها تعلق فى ذاكرتى ووجدانى وهناك عدد من علامات الاستفهام وعدد من الحلول لإفتراضات. وتخرجنا وذهب كل منا الى جامعته ودخلت حنان معهد الخدمة الاجتماعية ودخلت انا كلية التجارة.
وعملت بمكتب محاسب قانونى فى الابراهيميه وفى احد الايام بعد مواعيد العمل وانا فى طريقى للخروج من الشارع وعلى ناصيته رأيت حنان وتسمرت مكانى فقدت وزنها وتبحث فى القمامة عن اكل (ياإلهى ياربى اعمل اية) فاذا رأتنى أحرجتها واذا لم افعل شيئا فقد احتضنى عجزى وكنت فى هذا الوقت قوية الطاقة والتحمل والعزيمة فذهبت للرجل الذى يصلح اطار السيارات وكان يحترمنى ويقدرنى جدااااا وطلبت منه ان يراعيها دون ان تأخذ بالها منى او ترانى لاننا زملاء وقلت له بأنها انسانه محترمه ومتعلمه ووعدنى الرجل وكله زهول مما قد يفعل الانسان بأخوه الانسان ومر عدد من الايام وفى طريق خروجى من المكتب رأيت حنان وجها لوجه فسلمت عليها وسألتها ان كانت تتذكرنى فقالت نعم مش انتى الى كنتى قاعده جنب فيفيان (زميلتنا فى الدراسه) واسمك ساجى انا عارفاكى ازيك - دخلتى اية؟ وبتشتغلى فين؟ و..........وانهالت عليه بالأسئله وكأنها تدفع اى سؤال منى لها فجاوبتها بكل احترام وقلتلها انت احلويتى وخسيتى كده احسن ولو عوزتى حاجة انا شغاله فى المكتب ده تعاليلى قالتلى حاضر. ولا استطيع ان اصف كيف كان قلبى يدمع لها واقف عاجزة لا اجرؤ على جرحها مطلقا لعلمى بأنها تعى وتفهم كل شئ ومنتهى الذكاء ولكن تبقى الاشياء التى لانقوى عليها. ومرت الايام ورحلت للقاهره حبيبتى هذه البلاد رغم الجهاد فيها وفى احد اجازاتى الكئيبه بعد فصلى من عملى وفى الترام (كما نقول بالاسكندرية) رأيت حنان وكنت ارتدى نظارة الشمس فسألت نفسى هل تعرفنى ودار نفس الجوار بداخلى ورأيت جميع من فى الترام ينظرون لها نفس نظرات المدرسين والزملاء فقررت هذه المره التوجه ناحيتها وسلمت عليها وقلت لها هل تتذكرينى فقالت نعن مش انتى فلانه الى دخلتى كلية كذا وبتشتغلى عند المكتب الفلانى.....الخ فقلت نعم وسألتها عن احوالها وقلتلها عامله اية مع بابا ومراة بابا محاولة ان اعطيها فرصه للحوار ولكنها رفضت وقالتلى انا عايشة مع ماما وبابا قلتلها طيب ممكن اخذ رقم تليفونك واديكي رقم تليفونى ولو عوزتى اى حاجة تكلمينى قالتلى حاضر وهى تلهث الخوف وتتجرع الألام وكل عينيها خوف والم -ياربى- لم اقل لكم ان حنان مازال وجهها برئ وكأنها ابنه السبعة عشر عاما ولكنها خادمة المنزل المضروبة المهانه التى دمرت نفسيتها وقضى عليها لتكون هكذا فقد تهالكت نفسيتها - يارب يرعاكى يا حنان - يارب حنان

Monday, November 10, 2008

قلبى

نبض قلبى زور
نبض قلبى وقف
قلبى مات
وحنيتى صاحيه
اعمل ايه يا جدعان
نفسى قلبى يقسى وابقى غبيه بس مش عارفة
بتتعاب عليه حنيتى بتتعاب عليه طيبتى
كله بيمد ايده ياخذ
وانا بتفرج
عامله زى العيل العبيط
قلبى وجعنى
وذهنى بعد ما كان قادر يستوعب موسوعه مبقاش قادر يضيف جديد
لا لنفسه ولا لغيرة
طيب اعمل اية؟؟؟
افتونى عاوزة اوسع دماغى
اروح لدكتور نفسانى
ولا لصرماتى
ولا اعمل اية
انا بنتهى ومش قادرة ابقى الشخصية المهزومة دية
بموت بالبطئ
بنتحر
بحاول بس مش قادرة
ولا ده السن واحكامه؟؟؟
لو حد يعرف يقولى

نوع من البنات

البت ياخويا عشمت الواد على اعتبار انها عدت ال25 ومتجوزتش فقالت اهو اى حاجه والسلام
وأول ما لمعت حتة من ابو دولار جرت وقلبت الاولانى فى اقرب ركنه ولا كأن فيه حاجة
طيب ايه؟
طيب ازاى؟
ماديا يمكن
طيب من الاول ليه؟
وجرحته يا قلب امه
وهوه لسه حتة لحمه حمرة فى دنيا الحب
لا وقلبه مليان جراح من تشتت اسرى وفراق وعذاب
والواد تخيل انه لقى فى حضنها المستقر وفجأة
قام من النوم على برد بيلسعه ولقى نفسه فى حفرة تلج
ومشاعرة بردانه
مع ان التانية بتحبه لا ديه بتموت فيه كمان
بس ايه على رأى الدرويش الى يدور ما يلاقيش
هىىىىىىىىىىىىىىىىى دنياااااااااااااااا

شوف ياختى الراجل

شوف ياختى الراجل بكل بجاحه يفضل يجرى ورى البنيه من دول وهيه تقاوم
ولما توافق تبقى قليلة الادب ويخاف يتجوزها لحسن متصونهوش -
وليه هيه مخافتش لحسن تطلع صايع يا بيه؟

طيب اتجوز وغار بفكره البالى جميل وقعدت هيه زعلانه على حب راح
راجع تانى ليه ياراجل؟

طيب اتمحلس وقال وقال وظروفه وهو غلطان واسف
رفضت الجميله عشان هيه متقبلش تكون مكان الى عمال يشتم فيها
ويسب ويلعن ديه

مع الضغط والإلحاح ما هيه كمان بنى آدمة
تضعف وتفتكر قلبها وحب راح وسنين جرت من عمرها وتقول ماشى
طالما رجع يبقى ندم بس مش هينفع يطلق وحرام نمشى فى خراب
طيب نتجوز وحبنا يشوف النور

ههههههههههههههههه

وبردو البنيه لسه هبله ياعينى

يقنعها انهم هيتجوزو ومحتاجين يفكرو ازاى ومش ازاى واول ما توافق
وتهاوده وترجع الميه لمجاريها
سمعنى يا معلم - لا اصلى انا مش متقبل نفسيا ان يكون عندى بيتين
لا اصلى لما فكرت فى الموضوع لقيت انى مقدرش ابعد عن بنتى او ابنى وتكون علاقتى بيه ليها وقت
لا اصل واصل واصل

وترجع تانى الهبله - هيه هبله عشان صدقت بنى ادم لا يعى الانسانية وانانى- تجرجر اشلاء
خيبتها وندمها على وقتها المذبوح

لاحول ولا قوة الا بالله

طيب يا راجل انت عاوز ايه عاوز خليله تاخذ منها مشاعر
والتانيه تعيش معاها العسكرى الاخضر

طيب يا راجل انت بتبيع الغالى (الله) بالرخيص المجتمع والنفسيه الباهته
طيب يا روحى لما انت متقدرش بتجرى ورى البنيه ليه؟؟؟

مش لما تتفطم يا قلبى تبقى تدور على مشاعر

ولا هيه مشاعر استهتار وتسلية وقت وطالما هيه متجوزتش يبقى انت تعيش لغاية ماتبقى بتاعة حد
ويا عالم اذا بقت بتاعة حد هتبطل ولا هتعتبرها هيه الى سافله وبتفرط فى نفسها وتقول جوزها الى مغفل

طيب لو وافقتك على كل طفولتك الباهته ورجولتك المزيفه تعتقد ربنا هيوافقك على الحرام

الرسول قالك "رفقاً بالقوارير" ايه الى حصلكم يا رجاله

مصيبة مصر جت فى رجالتها ليه؟

فين ربنا فين الضمير فين الدين؟

بتقولو البنات تتحجب ليه؟؟؟

عشان انتم مش قادرين تمسكوا اخلاقكم البهتانه
ولا لأنكم اطفال ضاله بتدور دايما على شماعه تعلق اخطائها عليها

يارجالة ارجعواااا تانى
وأحلى من الشرف مفيش
الدم الحر - الرسول قدوة - الاسلام عقيدة القلوب............الخ

ألقيم يا أمهات ازرعوها فى الرجاله وربو رجالة وعرفوهم ان ربنا شايفهم شايفهم شايفهم

وقال ايه شوف ياختى الراجل مش لما يبقى راجل يا خيبتى يانا يارب

ربنا يصلح الحال يارب

(طبعا الكلام مش للناس الى رجاله بجد زى ما قال الله ورسوله الكريم وكل القيم الاخلاقيه والانسانيه) يالهوى يا بوىىىىىىىى

Sunday, September 28, 2008

دايما يارب

لما تدور بين العيون تتوه
لما تروح بين الاحضان وتتغرب
لما تحضن الايدين تضيع
ولما توصل للشط تغرق
لما فى حضن امك تنتحر
لما الأخ يتنكرلك
ولما الاخت مفيش
ولما الصديق يضل الطريق اليك
ولما الحبيب يبعت سهام تصيب
ولما السماء تمطر ألم
ولما الارض تطرح وجع
ولما البحر ملوش قرار
ولما الآه لاتتسمع جواك ولا براك
اكيد لسه فاضل كلمة
يارب

نورتـــــــــــــونا

السلام عليكم

فى الحقيقه مش عارفة ابداء منين ولكن خلينى اقول سبب تفعيل المدونه ديه هو الاستاذ الفاضل/محمود ومدونته ذكريات أبوخالد فى الحقيقه هو طلب منى إن لازم يكون عندى مدونه وبيقولى انه شايف انى عندى الى اقدر اكتبه بس انا مش شايفة فى نفسى ده خالص ولكنى وجدت فى نفسى الاستجابه لماطلبه وبالفعل أسميت مدونتىSagy Oasis على إعتبار أن الواحة هي المكان المنخفض فمثلا واحة سيوة هى أكثر واحات مصر انخفاضا عن سطح البحر، وواحة النفس
هى المكان الذى يختبئ فيه مكنونها بعيداً عن الأعين وهيه المكان الذى تتنفس فيه الصعداء داخل نفسك وتكون أمورك واضحه بدون أى مجاملات ولا ألوان ولا عمليات تجميل.

وكان ذلك فى هذا اليوم السابع والعشرين من سبتمبر2008 وكذلك السابع والعشرين من رمضان1429 والساعه الثامنه وواحد وأربعون دقيقه مساءً.

ولا أعرف ما أنوى أن أكتب أو ماذا سأكتب وأقول هل فعلا ستعبر عن تلك الواحة التى فى أعماقى.

لا أعرف إلى أين المنتهى ولكنها تجربه ولندع التجربة تمضى...